Жаңы "Ош базары" комплексиндеги коммерциялык жайлар январь айынын аягында сатыла баштайт
Жаңы курулуп жаткан "Ош базары" комплексиндеги коммерциялык жайларды сатуунун башталышы 2026-жылдын январь айынын аягына пландалып жатканын 24.kg редакциясына КРнын Президентине караштуу Иш башкармалыгынын басма сөз кызматы билдирген.
Базардын аймагында курулуш иштери активдүү жүргүзүлүүдө, объекттин монолиттик бөлүгү дээрлик толук бүткөрүлгөн. Курулушка жооптуу тараптардын божомолуна ылайык, аймактагы ири соода объекттеринин бири 2026-жылдын жай айынын башында ишин башташы мүмкүн.
Базардын жалпы аянты 155 миң чарчы метрди түзөт. Анын ичинен 50 миң чарчы метри соода аянттарына, 20 миң чарчы метри кампалык жайларга бөлүнгөн. Долбоордо ошондой эле чатыр менен жабдылган жашылча базары жана 500 унаага ылайыкталган жер астындагы унаа токтотуучу жай каралган.
Ишкерлерди көчүүгө алдын ала даярданууга чакырышууда.
Долбоор Президенттин тапшырмасы менен ишке ашырылып, заманбап соода инфраструктурасын түзүүгө багытталган. Жаңы жабык базар көчө соодасын алмаштырып, ишкерлерге санитардык талаптарга жооп берген ыңгайлуу жана коопсуз эмгек шарттарын түзүп бериши керек.
