АКШ 75 өлкөнүн жарандарына иммиграциялык визаларды берүү арыздарын кароону токтотту
АКШнын Мамлекеттик департаменти 75 өлкөнүн жарандары үчүн иммиграциялык визаларга арыздарды кароону убактылуу токтотконун Fox News телеканалы ведомствонун кызматтык кат-кагазына таянып билдирди.
Документке ылайык, консулдук кызматкерлерге карата текшерүү жана талапкерлерди тандоо жол-жоболору кайра каралып бүткөнгө чейин, колдонулуп жаткан мыйзамдардын алкагында визаларды берүүдөн баш тартуу тапшырмасы берилген.
Fox News билдиргендей, бул чечим 21-январдан тартып күчүнө кирет жана белгисиз мөөнөткө — Мамлекеттик департамент визалык жол-жоболорду толук кайра баалап бүткөнгө чейин уланат.
АКШнын Мамлекеттик департаменти түшүндүрмө берип, чектөөлөр АКШ бийлигинин баамында, жарандары америкалык салык төлөөчүлөрдүн эсебинен социалдык жардамды өтө көп алган өлкөлөргө карата киргизилгенин белгиледи. Чектөөлөр АКШ жаңы иммигранттар коом үчүн каржылык жүк болбой турганына толук ишене алганга чейин күчүндө болот.
Fox News маалыматына ылайык, тизмеге кирген 75 өлкө төмөнкүлөр:
Афганистан, Албания, Алжир, Антигуа жана Барбуда, Армения, Азербайжан, Багам аралдары, Бангладеш, Барбадос, Беларусь, Белиз, Бутан, Босния, Бразилия, Мьянма, Камбоджа, Камерун, Кабо-Верде, Колумбия, Кот-д’Ивуар, Куба, Конгонун Демократиялык Республикасы, Доминика, Египет, Эритрея, Эфиопия, Фиджи, Гамбия, Грузия, Гана, Гренада, Гватемала, Гвинея, Гаити, Иран, Ирак, Ямайка, Иордания, Казакстан, Косово, Кувейт, Кыргызстан, Лаос, Ливан, Либерия, Ливия, Түндүк Македония, Молдова, Монголия, Черногория, Марокко, Непал, Никарагуа, Нигерия, Пакистан, Конго Республикасы, Россия, Руанда, Сент-Китс жана Невис, Сент-Люсия, Сент-Винсент жана Гренадиндер, Сенегал, Сьерра-Леоне, Сомали, Түштүк Судан, Судан, Сирия, Танзания, Таиланд, Того, Тунис, Уганда, Уругвай, Өзбекстан, Йемен.
Иммиграциялык визалар АКШга туруктуу жашоого көчүп барууну каалаган чет өлкөлүк жарандарга берилет.
