Алкоголь жана тамеки товарларын ташууда жаңы пломба системасы киргизилет
11-февралдан тартып Кыргызстанда алкоголь жана тамеки продукциясын экспорттоо жана импорттоодо навигациялык пломбаларды милдеттүү колдонуу киргизилет. Бул тууралуу Мамлекеттик салык кызматында өткөн жыйындан билдирилди.
Иш-чарага Салык кызматынын жана Бажы кызматынын өкүлдөрү, Экономика министрлиги, ошондой эле бизнес коомчулугу катышты. Жыйындын жүрүшүндө бизнеске ЕАЭБдин талаптарына ылайык пломбаларды колдонуу тартиби жана эрежелери түшүндүрүлдү.
Салык кызматынын төрагасынын орун басары Кубанычбек Ысабеков пломбалоонун негизги максаты — декларацияланган товарлардын сакталуусун жана ишенимдүүлүгүн камсыз кылуу, мамлекеттик чек арадан өтүүнү тездетүү жана бизнеске болгон жүктү азайтуу экенин белгиледи.
Мындан ары Салык кызматы окуу иш-чараларын өткөрүп, пломбаларды колдонуу боюнча методикалык жардам көрсөтөт. Навигациялык пломбалар автомобиль жана темир жол транспорту аркылуу ташылуучу алкоголь, тамеки жана тамеки буюмдарына колдонулат.
