Бийлик ашыкча чыгымдарга катуу чектөөлөрдү киргизүүнү сунуштады
Министрлер кабинети жарандардын ашыкча чыгымдарын кыскартуу жана салттуу иш-чаралардагы социалдык басымды азайтуу максатында "Үй-бүлөлүк салтанаттарды жана аза күтүү жөрөлгөлөрүн тартипке салуу жөнүндө" токтом долбоорун коомдук талкууга чыгарды.
Негизги сунуштар:
- Үйлөнүү тойлорго жана үй-бүлөлүк салтанаттарга 200 адамдан ашык чакырууга болбойт, ошондой эле бир гана жылкы же уй союуга уруксат берилет.
- 350 адамдан ашкан ири тойлорго тыюу салынат.
- Фейерверктерге, ашыкча шоу-программаларга, ошондой эле ысырапкор салттарга — кийит кийгизүү, себет берүү, түштөндүрүү, кымбат белек берүүгө мажбурлоо — тыюу салынат.
- Каза болгон күнү мал союу сунушталбайт.
- Жылдык аш өткөрүү милдеттүү эмес.
- 3, 7 жана 40 күндүк аза күтүүдө майда жандык же бир гана жылкы же уй союуга уруксат берилет.
- Шаан-шөкөттүү аштарды кайрымдуулукка, мечитке садака берүүгө же коомдук муктаждыктарга жумшоону сунушталат.
Түшүндүрмө катта документтин максаты салттарды чектөө эмес, аларды иретке келтирүү экени белгиленген. Анткени көптөгөн үй-бүлөлөр кадыр-барк үчүн ашыкча чыгымга барып, карыз алууга мажбур болууда.
Долбоордо ошондой эле жергиликтүү бийлик органдарынын ролу аныкталган — калкка түшүндүрүү иштерин жүргүзүү жана белгиленген тартиптин сакталышын көзөмөлдөө.
