Кыргызстанда күйүүчү майлар 1–1,5 сомго арзандады
Кыргызстанда күйүүчү майдын баалары 1–1,5 сомго төмөндөгөнүн Нефтетрейдерлер ассоциациясынын өкүлү Канат Эшатов билдирди.
Анын айтымында, декабрдын аягында орус нефть кайра иштетүү заводдору жылдык сезондук арзандатууларды сунуштайт. Бул жылы декабрдын аягында дүң баалар азайгандыктан, айрым компаниялар келишим түзүп, күйүүчү майдын белгилүү көлөмүн сатып алышкан. Бул партиялар азыр өлкөгө келгенден кийин айрым күйүүчү станцияларында баа 1 сомго, кээ бир жерлерде андан да көп төмөндөдү.
Канат Эшатов белгилегендей, жакын арада жаңы баалар белгиленет, ошондуктан күйүүчү майдын келечектеги баасы так болжолдонбойт. Орусиялык заводдор сунуштаган дүң бааларына жараша Кыргызстандагы чекене баалар аныкталат.
