Кыргызстанда тигүү тармагынын 72%ы мыйзамсыз эмгек күчүн колдонот
Бүгүнкү күндө тигүү тармагынын 72%ы мыйзамсыз эмгек күчүн жана чет өлкөлүк жумушчуларды колдонуп жатканын "Ала-Тоо" депутаттык тобунун жыйынында ишкер Асель Атабекова билдирди.
Ал бул маалымат расмий эмес статистика экенин белгиледи.
"Бизде чет өлкөлүк жумушчуларды тартууга мүмкүнчүлүк пайда болду. Бирок биздин мыйзамдар, тактап айтканда, Эмгек кодексинин чет өлкөлүк жумушчуларды тартуу жана колдонуу эрежелерин бузгандыгы жөнүндөгү 93-беренеси өтө жумшак. Дээрлик бардык өндүрүүчүлөр өз ишканаларына чет өлкөлүк жумушчуларды тартып жатышат. Бул бааларды төмөндөтүүгө алып келет. Экинчиден, тигүүчүлөрдү окуткан мекемелер аларды жоготкондуктан атаандаштыкка жөндөмсүз болуп калат. Үчүнчүсү, бул көмүскө экономиканын улануусуна себеп болот. Мындан тышкары, бул салык кирешелеринин мамлекеттен жашырылышына алып келет", — деди Асель Атабекова.
Ал учурда Эмгек кодексинде мындай мыйзам бузууга 65 миң сом өлчөмүндө айып пул каралганын, бирок ишкананын ээси аны оңой эле төлөп, жумушчуларды тартууну уланта берерин белгиледи.
Ишкердин пикири боюнча мыйзамда Россиядагыдай айып пулду көбөйтүп, кошумча чара катары ишкананын ишмердүүлүгүн 90 күнгө токтотуу керек.
