Кыргызстанга 400 миң долларга чейин инвестиция салуучуларга 30 жылдык виза берүү каралат
Кыргызстанга 300-400 миң доллар инвестиция сала тургандарга 20-30 жылдык виза берүү мүмкүнчүлүгүн карап жатканын президентке караштуу Инвестициялар боюнча улуттук агенттигинин башчысынын орун басары Жалын Жээналиев “Биринчи радионун” түз эфиринде билдирди.
Анын айтымында, азыркы учурда дүйнөдө түз чет элдик инвестициялардын көлөмү 1,2 трлн долларга бааланып, Кыргызстан бул ири рыноктон өз үлүшүн алууну максат кылууда.
“Эгер мурда инвесторлорго негизги сунуш жер тилкелери менен чектелсе, бүгүнкү күндө мамлекет жеңилдиктер топтомун ишке киргизип жатат. Бажы төлөмдөрүнөн бошотуу, бир нече түрдөгү салыктардан узак мөөнөткө жеңилдик берүү ири, улуттук жана стратегиялык долбоорлор үчүн олуттуу дем берет. Айрыкча, жеңилдиктердин мөөнөтүн кошумча 5 жылга узартуу мүмкүнчүлүгү инвесторлорго туруктуулук жана ишеним берет”, - деди Жээналиев.
Белгилей кетсек, өзгөчө көңүл бурулуучу дагы бир багыт венчурдук каржылоону жана стартап экосистемасын өнүктүрүү экендигин маалымдалды.
“Бүгүнкү күндө венчурдук каржылоо деген түшүнүк бар. Венчурдук каржылоо – бул стартаптарды каржылоо болуп эсептелет. Тилекке каршы, бизде бүгүн ал база жок болуп турат. Бул базаны биз мыйзам түрүндө Жогорку Кеңешке киргизип, эгер кабыл алынса дүйнөлүк стартап фонддорду өлкөгө тартууга мүмкүнчүлүктөр түзүлөт”, - дейт ал.
