Алименттен качкан ата-энелер камакка алынышы мүмкүн
Кыргызстанда жашы жете элек балдарын багуудан (алимент төлөөдөн) баш тарткан ата-энелерди эркинен ажыратуу чаралары каралууда. Бул тууралуу Башкы прокуратуранын орун басары Үмүткан Конкубаева Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинин жыйынында билдирди.
Ал депутаттарга аткаруу өндүрүшү тармагындагы Кыргыз Республикасынын айрым мыйзам актыларына өзгөртүүлөрдү киргизүү боюнча мыйзам долбоорун тааныштырды.
Мыйзамда белгиленгендей, алименттик келишим же алимент төлөө боюнча соттун чечими аткарылбаган учурда сот аткаруучу Укук бузуулар жөнүндө кодекске ылайык протокол түзүп, аны сотко жөнөтөт. Ал эми алимент боюнча карыз 12 айга жеткенде материалдар ички иштер органдарына өткөрүлүп берилет.
Башкы прокурордун орун басарынын айтымында, төмөнкү чаралар каралган:
- алимент боюнча карыз 3 айга жеткенде — 3 суткага камакка алуу;
- бир жыл ичинде укук бузуу кайра кайталанса — 7 суткага камакка алуу;
- алиментти 12 ай бою төлөбөгөндө — 100 сааттан 200 саатка чейин коомдук иштерге тартуу же 1 жылга чейин эркинен ажыратуу;
- өзүнүн эмгек акысын жана кирешесин жашыруу же атайылап азайтып көрсөтүү, ошондой эле соттун чечимине же сот аткаруучунун токтомуна карабастан жумушка орношпой коюу — 100 миң сом айып пул же 3 жылга чейин эркинен ажыратуу менен жазаланат.
Айрым депутаттар алимент төлөөдөн качкан ата-энелерге карата катуу жаза колдонуу керектигин билдиришти. Депутат Дастан Бекешев алимент системасын жоюп, балдарга мамлекет тарабынан жөлөк пул төлөп, ошол эле учурда балдарын таштап кеткен жана аларды багуудан баш тарткан ата-энени мамлекет үчүн иштетүүнү сунуштады.
