Кыргызстанда 431 ломбардга уруксат кагазы берилген
Кыргызстанда 431 ломбард катталганын “Кабар” агенттигинин “Элден собол” берүүсүндө Финансы рыногун жөнгө салуу жана көзөмөлдөө кызматынын Финансылык рынокту көзөмөлдөө, контролдоо жана мониторинг жасоо бөлүмүнүн башчысы Сүйөркул Ашимжан уулу билдирди.
Ал белгилегендей, ломбарддарга уруксат кагазы берилген. Учурда алардын ишмердүүлүгүнө көзөмөл жүргүзүү күчөтүлүүдө.
“Ломбарддар өкмөт тарабынан бекитилген жобого ылайык, квартал жана жыл сайын отчетторун берип турат. Мындан тышкары, өзүбүздүн ыйгарым укуктарыбыздын чегинде ар жылдык пландуу текшерүүлөр болот. Анда жарандардын кайрылуулары, отчеттордо аныкталган кемчиликтер каралат. Ошондой эле кайсы бир ломбардга карата мыйзам бузуу фактылары катталса, пландан тышкары текшеребиз", - деди ал.
Ошондой эле Сүйөркул Ашимжан уулу эгерде, ломбардда чындап эле жарандын арызында белгиленген мыйзам бузуу фактылары аныкталса, Укук бузуулар кодексине ылайык, ломбардга 28 миң сом айып пул салынат.
"Кайрадан 3 жыл ичинде кайталап мыйзам бузулса, Лицензиялык укук берүү мыйзамынын негизинде ломбарддын ишин 90 күнгө токтото алабыз. Бул убакыт ичинде биз белгилеген талаптарды аткарышпаса, сот аркылуу алардын лицензиясын жокко чыгарабыз”, - деп белгиледи ал.
