СПЕКА алкагында Кыргызстан менен Түркмөнстан кызматташтыкты кеңейтүүдө
Кечээ Ашхабад шаарында Бириккен Улуттар Уюмунун СПЕКА программасынын жумалыгынын алкагында Кыргызстандын Экономика жана коммерция министринин орун басары Медербек Туманов Түркмөнстандын Финансы жана экономика министринин орун басары Бабанияз Ялаков менен жолугушту.
Экономика министрлигинен билдиришкендей, тараптар мурда жетишилген макулдашууларды ишке ашырууну улантуунун жана соода жүгүртүүнү көбөйтүү, транспорттук-логистикалык байланыштарды өнүктүрүү маселелерине өзгөчө көңүл бурушту.
Жолугушуунун жыйынтыгында эки өлкө эл аралык уюмдардын аянтчаларында кызматташтыкты өнүктүрүү боюнча конкреттүү кадамдарды белгилешти.
СПЕКА — Борбордук Азия өлкөлөрүнүн экономикалык кызматташтыгын чыңдоо жана туруктуу өнүгүүсүн колдоо максатында түзүлгөн БУУнун өкмөттөр аралык программасы. Ал соода, санариптештирүү, инновациялар, транспорт, гендердик теңчилик жана ресурстарды туруктуу башкаруу сыяктуу багыттарда тажрыйба алмашууга жана биргелешкен демилгелерди иштеп чыгууга мүмкүнчүлүк түзөт.
