Былтыр Кыргызстанда электр энергиясы менен күйүүчү май көбүрөөк кымбаттаган
2025-жылдын жыйынтыгы боюнча Кыргызстанда азык-түлүк эмес товарлардын баа индекси 7,8%га өстү.Расмий статистиканын маалыматына ылайык, эң жогорку кымбаттоо энергетика жана күйүүчү-майлоочу материалдар (КММ) тармагында катталды.
Эң олуттуу өсүш турак жай кызматтары, суу жана энергия категориясында байкалды — 14%. Мунун негизги себеби Министрлер Кабинети тарабынан бекитилген 2025–2030-жылдарга карата Орто мөөнөттүү тарифтик саясаттын алкагында электр энергиясына болгон тарифтердин 23,6%га жогорулашы болду. Табигый газдын баасы 6,8%га өстү.
КММдин кымбатташы инфляциялык басымды күчөттү: орточо эсеп менен баалар 14,5%га өскөн. Бензиндин баасы 15,1%га, дизелдик отун 11,1%га кымбаттаган.
Аналитиктер май куюучу жайлардагы баанын өсүшүнүн үч негизги себебин белгилешет:
- Россиядагы мунай иштетүүчү заводдордун оңдоп-түзөө иштеринен улам экспорттун чектелиши;
- геосаясий чыңалуу жана Россияда күйүүчү май тартыштыгы;
- экономиканын ылдам өсүшүнө байланыштуу Кыргызстанда КММге болгон ички керектөөнүн көбөйүшү.
Алкоголь жана тамеки буюмдарынын баасы 8%га жогорулады. Тамеки продукциясы 9,8%га кымбаттаган, буга акциздердин пландуу жогорулатылышы себеп болгон. Ал эми алкоголдук ичимдиктердин баасы өндүрүш жана логистикалык чыгымдардын өсүшүнөн улам 7,2%га өскөн.
Узак мөөнөттүү пайдаланылуучу товарлар сегментинде баанын өсүшү салыштырмалуу орточо болду: кийим-кече жана бут кийим 3,4%га, үй-тиричилик буюмдары жана тиричилик техникасы 4,8%га кымбаттады.
