JDS долбоору боюнча адистерди даярдоого Япония 399 млн иен бөлөт
Мамлекеттик кызмат жана жергиликтүү өз алдынча башкаруу иштери боюнча мамлекеттик агенттикте агенттиктин директору Эльчибек Джантаев менен Кыргызстандагы Япониянын элчиси Хирано Рюитинин жолугушуусу болуп өттү.
Жолугушууда кадрдык потенциалды өнүктүрүү жаатындагы кызматташтык, анын ичинде JICA жана JICE менен биргеликте ишке ашырылып жаткан JDS стипендиялык программасынын жыйынтыктары талкууланды.
Маалыматка ылайык, JDS долбоорунун алкагында 20-агым боюнча магистратура жана докторантура программалары аркылуу адистерди даярдоо каралган. Бул максатта Япония өкмөтү 399 миллион иен өлчөмүндө грант бөлгөн.
2006–2025-жылдар аралыгында Кыргызстандан 327 мамлекеттик жана муниципалдык кызматкер, ошондой эле "Жаш лидерлер" программасынын алкагында 28 адис Японияда билим алган.
Жолугушуунун жүрүшүндө төмөнкү демилгелер сунушталды:
JDS программасынын квотасын 50 орунга чейин көбөйтүү (азыркы учурда 20 орун: 19 магистратура, 1 докторантура);
"Жаш лидерлер" программасынын квотасын 10 орунга чейин жогорулатуу.
Эльчибек Джантаев белгилегендей, 2026-жыл эки тараптуу кызматташтык үчүн өзгөчө мааниге ээ. Анткени бул жылы JDS программасынын 20 жылдыгы жана JICAнын Кыргыз Республикасындагы өкүлчүлүгүнүн 25 жылдыгы белгиленет.
