Кыргызстан менен Германия соода жана инвестиция багытында кызматташууну күчөтөт

Кечээ Экономика жана коммерция министринин орун басары Султан Ахматов Германиянын Тышкы иштер министрлигинин Чыгыш Европа, Түштүк Кавказ жана Борбордук Азия маселелери боюнча ыйгарым укуктуу өкүлү Никлас Вагнер жана Германиянын Кыргыз Республикасындагы Атайын жана Ыйгарым укуктуу Элчиси Моника Ленхард менен жолугушуу өткөрдү.

Ведомствонун маалыматына ылайык, жолугушуунун жүрүшүндө кыргыз-герман мамилелеринин учурдагы абалы жана өнүгүү келечеги боюнча пикир алмашуу болуп, соода-экономикалык кызматташтыкты өнүктүрүү, инвестицияларды тартуу, жаштарды даярдоо жана окутуу, ошондой эле жашыл экономиканы илгерилетүү маселелери талкууланды.

Тараптар эки өлкөнүн ортосундагы кызматташууну мындан ары кеңейтүүгө жана биргелешкен демилгелерди ишке ашырууга кызыкдар экенин билдиришти.