Финансы министрлигинде 133 млн сомдон ашуун бюджеттик бузуулар аныкталды
Эсептөө палатасы Финансы министрлигинде жана анын түзүмдүк, ведомстволук бөлүнүштөрүндө 2024-жылдын 1-январынан 31-декабрына чейинки мезгил аралыгында бюджеттин аткарылышына шайкештик аудит жүргүздү.
Аудиттин жыйынтыгында бюджеттик мыйзамдардын жана ченемдик укуктук актылардын талаптарынын сакталбагандыгы менен байланышкан дал келбестиктердин жалпы суммасы 133,3 млн сомду түздү. Бул бюджеттик пландоодо, каржылык башкарууда жана тартипти камсыздоодо олуттуу кемчиликтер бар экенин көрсөтөт.
Аныкталган бузуулар бюджеттик процесстин бардык негизги баскычтарын камтыган. Атап айтканда, сапатсыз пландоого байланышкан бузуулар, баа жана тарифтерди түзүүдөгү укуктук дал келбестиктер, бюджеттик каражаттарды максатсыз пайдалануу фактылары аныкталды. Ошондой эле капиталдык курулуш иштеринде нарктын негизсиз жогорулатылышы, бекитилген бюджеттен ашыкча чыгымдоолор, мүлктүн сакталышы жана бухгалтердик эсеп жүргүзүүдөгү кемчиликтер катталды.
Мындан тышкары, мамлекеттик сатып алууларда да ченемдик талаптарды бузуу учурлары аныкталган.
Аудиттин жыйынтыгы боюнча Эсептөө палатасы тиешелүү мамлекеттик органдарга мыйзам бузууларды жоюу, бюджеттик тартипти чыңдоо жана каржылык башкаруунун натыйжалуулугун жогорулатуу боюнча сунуштарды берди. Ошондой эле аныкталган бузууларга жол берген кызмат адамдарынын жоопкерчилигин кароо маселеси мыйзамга ылайык компетенттүү органдардын кароосуна жөнөтүлдү.
