Салык кызматы жасалма ЭСФларды жөнгө салып жатат
Мамлекеттик салык кызматы (МСК) электрондук эсеп-фактураларды (ЭСФ) реалдуу чарбалык операцияларсыз жасалма түрдө тариздөө фактыларын аныктап жатканын мекеменин басма сөз кызматы билдирди.
Маалыматка ылайык, мыйзам бузуулар тобокелдикке багытталган ыкманы колдонуу менен жүргүзүлгөн аналитикалык иштердин, ошондой эле заманбап санариптик инструменттердин жана маалыматтык системалардын негизинде аныкталууда.
Белгиленгендей, айрым салык төлөөчүлөр ойдон чыгарылган чыгымдарды түзүү жана салыктык милдеттенмелерди мыйзамсыз азайтуу максатында жасалма электрондук эсеп-фактураларды тариздеп жатышат.
Ведомстводо электрондук эсеп-фактураларды берүү реалдуу чарбалык операция болгон учурда жана товарлардын, иштердин же кызмат көрсөтүүлөрдүн иш жүзүндө кыймылы тастыкталганда гана жол берилерин баса белгилешти.
ЭСФларды жасалма документ жүгүртүү схемаларында колдонуу салык мыйзамдарын түздөн-түз бузуу болуп эсептелет жана мыйзамда каралган жоопкерчиликке алып келет.
Мамлекеттик салык кызматы салык төлөөчүлөрдү мыйзамсыз аракеттерди токтотууга жана ишкердик ишмердүүлүктү ак ниеттүү жүргүзүүгө чакырып, мындай мыйзам бузуулар үчүн санкциялар сөзсүз колдонуларын жана олуттуу каржылык жоготууларга алып келиши мүмкүн экенин эскертти.
