Кыргызстанда айылдардын 50%ы ичүүчү суу менен камсыз болгон
Кыргызстанда айылдардын болжол менен 50%ы гана ичүүчү таза суу менен камсыздалганын Суу ресурстары, айыл чарба жана кайра иштетүү өнөр жайы министрлигинин биринчи орун басары Жаныбек Керималиев парламент жыйынында билдирди.
Депутат министрдин орун басарынан шаар калкынын канча пайызы ичүүчү суу менен камсыз болгонун тактады. Керималиев шаарлар боюнча өзүндө так маалымат жок экенин айтты.
Депутат Үмбөталы Кыдыралиев алардын маалыматына ылайык, Бишкек шаарында калктын 90%ы ичүүчү суу менен камсыз экенин белгиледи. "Административдик-аймактык реформа алкагында шаарга Мурас-Ордо, Салкын, Озёрное сыяктуу жаңы конуштар кошулду. Бул аймактарда 15 миңге жакын адам жашайт. Ошондой эле Ак-Босого конушунда болжол менен 20 миңдей калк бар. Эң эле негизги жана фундаменталдуу маселе — бул аймактарды ичүүчү таза суу менен камсыз кылуу", — деп баса белгиледи депутат.
Өз кезегинде "Ичүүчү суу менен камсыз кылуу жана саркынды сууларды чыгарууну өнүктүрүү" мамлекеттик мекемесинин директору Азамат Шадманов суу менен камсыз кылуу түздөн-түз жергиликтүү өз алдынча башкаруу органдарынын милдети экенин билдирди. Анын айтымында, аталган мекеме ар кандай долбоорлорду жана программаларды иштеп чыгып, ишке ашырат. Депутат айткан турак жай массивдери боюнча учурда пландар жана долбоорлор бар, алар боюнча иштер жүргүзүлүп жатканын кошумчалады.
