АКШ чет өлкөлүк жардамга жаңы чектөөлөрдү киргизди
АКШ чет өлкөлүк жардамга жаңы чектөөлөрдү киргизгенин Reuters агенттиги маалымдады. АКШ бийлиги ар түрдүүлүк, тең мүмкүнчүлүк жана инклюзивдүүлүк (diversity, equity, inclusion — DEI) менен байланышкан программаларды, ошондой эле үй-бүлөнү пландаштыруу жана "гендердик идеология" жаатындагы демилгелерди каржылоого тыюу салды.
Бул чектөөлөр 26-февралдан тартып күчүнө кирет. Таасир эте турган каржылоонун жалпы көлөмү болжол менен 30 млрд долларды түзөт.
Чектөөлөр чет өлкөлүк өкмөттүк эмес уюмдарга (ӨЭУ) да, ошондой эле АКШда жайгашкан уюмдарга да тиешелүү болот. Мында чет өлкөлүк ӨЭУларга, эгерде программалар АКШ администрациясы "радикалдуу идеология" деп эсептеген багыттарга кирсе, америкалык эмес донорлордон алынган каражаттарды да пайдаланууга тыюу салынат.
Эске салсак, Дональд Трамптын инаугурациясынан кийин кол койгон алгачкы жарлыктарынын бири АКШнын бардык федералдык мекемелеринде социалдык жана гендердик топторду колдоого багытталган программаларды жокко чыгаруу болгон.
