Бишкекте бир жашка чейинки 60тан аз, 3 жашка чейин 200дөй гана бала жөлөк пул алат
Кыргызстандын мыйзамдарында мамлекеттик жөлөкпулдарды алуу үчүн көптөгөн тоскоолдуктар бар экенин "Элдик" жана "Ала-Тоо" депутаттык топторунун биргелешкен жыйынында МинКаб төрагасынын орун басары Эдиль Байсалов билдирди.
Анын айтымында, учурда социалдык төлөмдөрдүн алты түрү бар жана аларды ай сайын болжол менен 300 миң адам алып келет:
- бала төрөлгөндө — 4 миң сом;
- 16 жашка чейинки балдары бар аз камсыз болгон үй-бүлөлөргө — 1 миң 200 сом;
- пенсия алууга укугу жок жарандарга социалдык жөлөкпул — 6 миң 300 сом;
- ата-энеси белгисиз балдарга — 6 миң сом;
- бийик тоолуу райондордо үчүнчү жана андан кийинки балдар үч жашка чыкканга чейин үй-бүлөлөргө — 3 миң сом;
- бийик тоолуу райондордо көп балалуу энелерге бала төрөлгөндө (төртүнчү жана андан кийинки) — 100 миң сомдон 1 миллион сомго чейин (бир жолку төлөм).
Ошол эле учурда Эдиль Байсалов мурда бюджеттин чектелүү болгондугуна байланыштуу өкмөт жөлөкпулдардын даректүүлүгү боюнча саясат жүргүзгөнүн белгиледи.
"Жөлөкпул алуу үчүн ар кандай тоскоолдуктар түзүлгөн. Азыр болсо биз Конституциядагы Кыргызстан социалдык мамлекет экендиги тууралуу беренеге толук жооп бербей жатабыз. Президент социалдык төлөмдөрдө тоскоолдуктардын көптүгүнө нааразы. Мисалы, Бишкекте 1,5 млн калк жашаса да, бир жашка чейинки 60тан аз бала гана жөлөкпул алат, ал эми үч жашка чейинкилер — болжол менен 200. Бул туура эмес", — деди МинКаб төрагасынын орун басары.
Ал ошондой эле Министрлер кабинетинде жана депутаттар тарабынан жөлөкпулдарды төлөөгө байланыштуу ар кандай долбоорлор демилгеленип жатканын жана алардын баары каралып, талкууланарын кошумчалады.
