Кыргызстанда 950 миң бала жакырчылык деңгээлинде жашайт
Кыргызстанда калктын жакырчылык деңгээли өтө жай төмөндөп жатат. Бул тууралуу депутаттык "Элдик" жана "Ала-Тоо" топторунун биргелешкен жыйынында Министрлер кабинетинин төрагасынын орун басары Эдиль Байсалов билдирди.
"Элдик" тобунун лидери Акылбек Түмөнбаев депутаттар Министрлер кабинетинин өкүлдөрүн мамлекеттик жөлөкпулдар боюнча мыйзамдардын аткарылышын талкуулоо үчүн чакырганын белгиледи. Анын айтымында, 12 жашка чейинки бардык балдарга жөлөкпул берүү тууралуу мыйзам долбоору демилгеленген.
Эдиль Байсалов калктын жакырчылык көрсөткүчү пандемия маалында кескин өсүп, 30%га жеткенин айтты.
"Эгер адамдын жылдык кирешеси 65 миң сомдон төмөн болсо, ал жакырчылыктын чегинде жашайт деп эсептелет. Өткөн жылы бул көрсөткүч 25,7%ды түздү. Бардык аракеттерге карабастан, жакырчылык өтө жай — жылына болгону 2%га гана азайып жатат", — деди Министрлер кабинетинин төрагасынын орун басары.
Анын айтымында, 16 жашка чейинки балдар арасындагы жакырчылык деңгээли 33%га жетет. Кыргызстанда 950 миң бала жакырчылыктын чегинде жашоодо.
Ошондой эле Эдиль Байсалов Министрлер кабинетинин беш жылдык планына жакырчылык деңгээлин 20%га чейин төмөндөтүү пункту киргизилгенин, ал эми беш жыл ичинде бул көрсөткүчтү 15%га чейин төмөндөтүүгө үмүт бар экенин кошумчалады.
