Жогорку Кеңеште 12 жашка чейинки балдардын баарына жөлөк пул берүү сунушталды
Учурда бала төрөлгөндө берилүүчү бир жолку жөлөкпул 4 миң сомду, ал эми аз камсыз болгон үй-бүлөлөр үчүн ай сайынкы жөлөкпул 1,2 миң сомду түзөрүн Жогорку Кеңештин депутаты Акылбек Түмөнбаев билдирди.
Анын айтымында, депутаттык топтор эки маселени карап жатышат — мамлекеттик жөлөкпулдар тууралуу мыйзамдардын аткарылышы жана миграциялык саясаттагы өзгөрүүлөрдүн чет өлкөлөрдө жүргөн Кыргызстандын жарандарынын социалдык абалына тийгизген таасири.
Түмөнбаев белгилегендей, тиешелүү мыйзамдар бар болгонуна карабастан, балалуу үй-бүлөлөргө көрсөтүлүп жаткан реалдуу колдоо чектелүү бойдон калууда жана калктын чыныгы муктаждыктарына толук жооп бербейт.
Ал депутаттар бардык балдар үчүн тең шарттарды түзүүгө багытталган демилгени илгерилетүүнү көздөп жатканын билдирди. Сунуш боюнча, 12 жашка чейинки бардык балдарга мамлекеттик жөлөкпул төлөнүшү керек. Ошол эле учурда 16 жашка чейинки балдары бар аз камсыз болгон үй-бүлөлөргө каралган учурдагы колдоо чараларын сактап калуу сунушталууда.
"Эмгек, социалдык камсыздоо жана миграция министрлигинин маалыматына ылайык, жөлөкпул алып жаткан аз камсыз болгон үй-бүлөлөрдөгү 16 жашка чейинки балдардын саны 163 миң 592ни түзөт. Ал эми мамлекеттик статистиканын маалыматтары боюнча, өлкөдө 12 жашка чейинки балдардын саны 1,8 миллиондон ашат", — деп маалымдады ал.
Түмөнбаев демографиялык саясатты эске алуу менен жөлөкпул дайындоонун механизмин кайра карап чыгып, үй-бүлөнүн социалдык абалына карабастан бардык балдарга колдоо көрсөтүү зарыл экенин белгиледи.
Ошондой эле депутат "Баатыр эне" наамына ээ болгон энелерге кошумча 5 миң сом өлчөмүндө социалдык колдоо көрсөтүү боюнча демилге бар экенин кошумчалады. Анын айтымында, бул алардын өлкөнүн демографиялык өнүгүшүнө жана балдарды тарбиялоого кошкон зор салымын эске алуу менен зарыл.
