Ишкерлерди тейлөө борборуна АӨБдөн 1 млн субгрант алынат
МинКаб "Ишкерлерди тейлөө борборун өнүктүрүү" долбоорунун алкагында иш-чараларды ишке ашыруу үчүн Азия өнүктүрүү банкы менен субгранттык макулдашуунун долбоорун жактырды. Тиешелүү тескеме 2025-жылдын 30-декабрында № 1170-т менен кабыл алынды.
Документке ылайык, Финансы министри макулдашууну принципиалдуу эмес мүнөздөгү өзгөртүүлөрдү жана толуктоолорду киргизүү укугу менен кол коюуга ыйгарым укуктуу.
Макулдашуунун долбооруна ылайык, Кыргыз Республикасына 1 млн доллар өлчөмүндө субгрант берилет. Каражаттар ишкерлерди тейлөө борборлорун өнүктүрүүгө багытталган иш-чараларды колдоого жумшалат, анын ичинде:
– ишкерлерге кызмат көрсөтүү үчүн интеграцияланган агенттиктин операциялык моделин иштеп чыгуу;
– ишкерлерди тейлөө борборлору аркылуу лицензиялоо жана сертификациялоо жаатындагы кызматтарды оптималдаштыруу жана кеңейтүү;
– кызматтарды онлайн режиминде көрсөтүү үчүн санариптик платформаны киргизүү.
Иш-чараларды ишке ашыруучу агенттик катары Экономика жана коммерция министрлиги аныкталды. Каржылоо Экономикалык диверсификацияны илгерилетүү программасынын (3-подпрограмма) алкагында жүзөгө ашырылат.
Субгрантты жабуунун акыркы мөөнөтү 2028-жылдын 30-июнуна белгиленген. Каражаттардын негизги бөлүгү — 933,86 миң доллары — консультациялык кызматтарга, жабдууларды сатып алууга жана потенциалды жогорулатууга багытталат, ал эми калган бөлүгү бөлүштүрүлбөгөн каражат катары каралган.
Макулдашууда каржылык башкаруу жана коргоо чаралары боюнча Азия өнүктүрүү банкынын талаптарын сактоо, ошондой эле салыктарды жана жыйымдарды кошо алганда, кошумча чыгымдарды биргелешип каржылоону Кыргыз Республикасынын камсыз кылуу милдеттенмеси каралган.
