АКШнын ири компаниялары менен инвестициялык келишимдер түзүлөт
Бишкекте америкалык алдыңкы компаниялардын жана Кыргызстандын мамлекеттик органдарынын өкүлдөрүнүн катышуусунда эки тараптуу жолугушуулар өтүп жатканын Инвестициялар боюнча улуттук агенттиктен билдиришти.
Маалыматка ылайык, жолугушуулар Кыргызстан менен АКШнын ортосундагы инвестициялык жана экономикалык кызматташууну чыңдоого, ошондой эле экономиканын артыкчылыктуу тармактарында ишкердик байланыштарды кеңейтүүгө багытталган.
Америкалык тараптан АКШ–Кыргызстан шшкердик кеңеши, АКШнын Эл аралык өнүгүү боюнча финансылык корпорациясы (DFC), Невада университети (Рино), Эл аралык билим берүү боюнча Америкалык кеңештер, ошондой эле GE Healthcare, Pfizer, Abbott, Nasdaq, StoneX, Cove Kaz Capital Group, Mooney Group, Equion Group, All American Rail Group, Pangea-Global LLC жана TETHYS: Trans-Eurasian Gateway сыяктуу ири эл аралык компаниялар катышууда.
Эки тараптуу жолугушууларда инвестиция, инфраструктура, саламаттык сактоо, билим берүү, транспорт жана логистика, финансы рыноктору, ошондой эле заманбап технологияларды киргизүү багыттарындагы кызматташуунун артыкчылыктуу маселелери талкууланды. Кыргызстанда биргелешкен инвестициялык, инфраструктуралык, технологиялык жана социалдык долбоорлорду ишке ашыруу мүмкүнчүлүктөрүнө өзгөчө көңүл бурулду.
Белгиленгендей, эртең, 3-февралда Кыргызстан менен америкалык өнөктөштөрдүн ортосунда инвестициялык кызматташууну өнүктүрүүгө жана биргелешкен долбоорлорду ишке ашырууга багытталган кызматташтык жөнүндө бир катар меморандумдарга кол коюу пландалууда.
