Ири суммадагы акча талап кылгандар кармалды
Милиция кызматкерлери өзгөчө ири өлчөмдө опузалап талап кылууга тиешеси бар адамдар тобунун ишмердүүлүгүнө бөгөт коюшканын ИИМдин басма сөз кызматы билдирди.
Маалыматка ылайык, милицияга Ж.З. аттуу жаран арыз менен кайрылган. Анын айтымында, өздөрүн Хамза жана Али деп тааныштырган белгисиз адамдар маркум уулунун буга чейин болгон карызын шылтоо кылып, андан 7 млн сом талап кылышкан. Баш тарткан учурда арыз ээсине зомбулук көрсөтөбүз деп коркутушкан.
Бул факт боюнча ИИМдин тергөө кызматы Кыргыз Республикасынын Кылмыш-жаза кодексинин 208-беренеси боюнча кылмыш ишин козгоду.
ИИМдин Кылмыш иликтөө башкы башкармалыгынын кызматкерлери тергөө кызматы менен биргеликте жүргүзгөн ыкчам-иликтөө иш-чараларынын жүрүшүндө талап кылынган акчанын бир бөлүгүн алып жаткан учурда К.Н. (2005-жылы туулган) жана Т.Х. (2001-жылы туулган) кармалды.
Кийинчерээк үчүнчү катышуучу — Ж.А. (1986-жылы туулган) да аныкталып, кармалды. Тергөө маалыматтарына ылайык, ал кылмыштын уюштуруучусу болгон. Анын жашаган жеринде тинтүү жүргүзүлүп, кылмыштуу топ тарабынан пайдаланылган транспорт каражаты алынган. Унаа айып короого коюлду.
Бардык кармалгандар ИИМдин тергөө кызматына жеткирилип, Бишкек ШИИББнын убактылуу кармоочу жайына камакка алынды.
Тергөө учурунда Ж.А. жабырлануучу менен бир нече жылдан бери тааныш болгону, анын мүлктүк абалы жана үй-бүлөлүк жагдайлары тууралуу маалыматка ээ экени аныкталган. Арыз ээсинин уулунун каза болгонунан пайдаланып, ал опузалап талап кылуу ишин уюштуруп, башка адамдарды кылмышка тарткан.
