Кыргызстанда 411 мыйзамсыз таштанды жайлары 290го кыскарды
Кыргызстанда башаламан таштанды төгүлгөн жайларды кыскартуу боюнча иштер уланып жатканын агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча жыйында Жаратылыш ресурстары, экология жана техникалык көзөмөл министри Медербек Машиев билдирди.
Анын айтымында, өлкөдө административдик-аймактык реформа (ААР) улантылып жатат.
"Мурда өлкө боюнча 411 мыйзамсыз, башаламан таштанды жайы бар болчу, административдик-аймактык реформадан кийин алардын саны 290го чейин кыскарды. Салыштыруу үчүн айтсак, калкы 40 миллион болгон Өзбекстанда болгону 120 таштанды полигону бар. Биз да өлкө боюнча таштанды жайларын ирилетип, бириктирүү иштерин жүргүзүп жатабыз. Бул боюнча жобо иштелип чыгып, аны ишке ашыруу үчүн жергиликтүү бийлик органдарына өткөрүлүп берилди", — деди Медербек Машиев.
Жыйында депутат Эркайым Сейитказиева Ысык-Ата районунун Гагарин айылындагы таштанды полигону маселесин чечүүгө чакырды.
"Жай мезгилинде ал полигон дайыма күйүп, анын түтүнүнө жергиликтүү тургундар жана Кант шаарынын жашоочулары дем алууга аргасыз болууда. Ал жерде таштандыларды сорттоочу ишкана куруу зарыл", — деп кошумчалады ал.
Министр эл аралык уюмдар менен туруктуу иш алып барылып жатканын да белгиледи.
"Өзүңүздөр билгендей, Бишкек шаарында таштандыны кайра иштетүүчү завод ишке кирди. Азыр анын кубаттуулугун кеңейтүү маселеси каралууда, мындан ары ал Чүй облусундагы полигондордон чыккан таштандыларды да кайра иштете ала тургандай болушу керек", — деп кошумчалады ал.
