Кыргызстанда жаштардын өнүгүүсүнө багытталган каржылоо 50 млн сомго жетти
Кыргызстанда жаштардын өнүгүүсүнө багытталган каржылоо көбөйгөнүн Маданият, маалымат жана жаштар саясаты министринин орун басары Марат Тагаев Жогорку Кеңештин илим, билим берүү, инновациялык өнүгүү жана маалыматтык технологиялар, маданият, спорт жана жаштар иштери боюнча комитетинин жыйынында билдирди.
Анын айтымында, буга чейин бул багыттагы бюджет 4 млн сомду түзсө, учурда ал 50 млн сомго жетти.
Мындан тышкары, министрлик жаштар долбоорлорун мамлекеттик социалдык буйрутма аркылуу да каржылайт.
"2023-жылдан тарта жаштар уюмдарынын арасында конкурс өткөрүлүп келет. Эң мыкты долбоорлор тандалып алынып, ар бирине 1 млн сомго чейин каржылоо берилет. 2025-жылы 11 долбоорго 10 млн сом бөлүнүп, колдоо көрсөтүлдү", — деди министрдин орун басары.
Өз баяндамасында Марат Тагаев өлкөдө 2020–2030-жылдарга карата жаштар саясатынын концепциясы кабыл алынганын эске салды. Анын алкагында жаштардын потенциалын кеңейтүү, жумушка орношуу мүмкүнчүлүктөрүн жогорулатуу, билим берүү жана өнүгүүнү чыңдоого багытталган иш-чаралар жүргүзүлүүдө.
Министрдин орун басарынын айтымында, эки жылда бир жолу "Кыргызстан жаштарынын жыргалчылык жана өнүгүү индекси" аттуу улуттук изилдөө жүргүзүлөт. Акыркы изилдөө 2025-жылы өткөрүлүп, анын жыйынтыктары 2026-жылдын январь айында сунушталган.
Ошондой эле ал депутаттарга жаштар арасында өткөрүлүп жаткан конкурстар, жаш кыргызстандыктардын улуттук жана эл аралык долбоорлорго катышуусу жана алардын ар кандай тармактарга кошуп жаткан салымы тууралуу кеңири маалымат берди.
2025-жылга карата Кыргызстанда 14 жаштан 35 жашка чейинки 2 млн 519 миң жаран бар экени белгиленди.
