АКШ лидери Индия Россиянын мунайынан баш тартканын билдирди
Дональд Трамп Индиянын премьер-министри Нарендра Моди менен сүйлөшкөнүн жана ал Россиянын мунайын сатып алуудан баш тартканын Truth соцтармагына жазганын "Азаттык" жарыялады.
Россия Украинага кол салгандан кийин Индия Батыш санкция киргизген орус газын жана мунайын ири көлөмдө төмөн баа менен сатып ала баштаган.
"Ал россиялык мунайды сатып алуудан баш тартууга жана АКШдан, балким, Венесуэладан көбүрөөк сатып алууга макул болду. Бул Украинадагы жума сайын миңдей киши өлүп, так ушул маалда жүрүп жаткан согушту токтотууга көмөктөшөт", - деп жазды Трамп.
Ал ошондой эле АКШ Индия менен жаңы соода келишимин түзүүнү макулдашканын билдирди. Ага ылайык, индиялык товарлардын экспорттук тарифи 25%дан 18%га чейин төмөндөтүлөт. Трамптын сөзүнө караганда, ошол эле учурда Индия бул келишим алкагында АКШдан 500 млрд доллардан ашык акчага товар сатып алат.
2025-жылы августта АКШ Индиядан импорттолчу товарларга кошумча 25% тариф киргизген. Буга Индиянын Россиядан түз жана кыйыр түрдө мунай сатып алып жатканы себеп болгон. Мындан кийин тариф ставкасы 50%га жогорулаган, анткени ага чейин эле АКШ менен Индиянын өз ара төлөмдөрү 25% болгон.
