Жаратылыш министри Кутессай-II жана Калесай кендерине барды
Жаратылыш ресурстары, экология жана техникалык көзөмөл министри Акыл Токтобаев Чүй облусунун Кемин районунда жайгашкан Кутессай-II жана Калесай кендерине жумушчу сапар менен барды. Бул тууралуу бүгүн министрликтен кабарлады.
Билдирүүгө караганда, министр тарабынан кендерди иштетүүдө геологиялык чалгындоо иштерин уюштуруу жана жүргүзүү, алардын натыйжалуулугун жогорулатуу, ошондой эле коюлган милдеттерди белгиленген мөөнөттө аткаруу боюнча артыкчылыктуу багыттар жана мындан аркы милдеттер белгиленди.
Бүгүнкү күнгө чейин жүргүзүлүп жаткан геологиялык чалгындоо иштеринин алкагында жалпы узундугу 3 миң погондук метр геологиялык скважиналар бургуланып, лабораториялык изилдөөлөрдү жүргүзүү үчүн 1 500дөн ашык сынамык үлгү алынган.
Аталган иштер "Кыргызгеология" мамлекеттик ишканасынын адистери тарабынан аткарылууда.
Кутессай-II жана Калесай кендери Кемин районунда, деңиз деңгээлинен 2 000–2 800 метр бийиктикте жайгашкан. Анда пайдалуу кендер: сейрек кездешүүчү жер элементтери, полиметаллдар жана бериллий бар.
Бүгүнкү күндө Кутессай-II жана Калесай кендеринин аймагында геологиялык түзүлүшүн кеңири изилдөөгө багытталган бургулоо иштери активдүү улантылууда.
