Кытай компаниялары Кыргызстан шаарларын санариптештирүүнү инвестициялайт
Улуттук инвестициялар агенттигинин жетекчиси Равшанбек Сабиров Shanghai Minghou Xufu Business Consulting Management Co., Ltd. жана Anté Lingkun (Shanghai) Technology Co., Ltd. компанияларынын өкүлдөрү менен жолугушканын агенттиктин басма сөз кызматы билдирди.
Маалыматка ылайык, жолугушууда санариптештирүүгө, туруктуу өнүгүүгө жана шаардык, социалдык инфраструктураны модернизациялоого багытталган конкреттүү инвестициялык долбоорлор талкууланды. Анын ичинде Токмок шаарын өнүктүрүүгө байланышкан демилгелер да каралды. Тактап айтканда, төмөнкү долбоорлор сунушталды:
- "Глобалдык экологиялык шаар" долбоору — экологиялык жактан таза жана интеллектуалдык технологияларды, анын ичинде инфраструктураны башкаруунун санариптик системаларын колдонуу менен туруктуу шаардык чөйрөнү түзүүнү көздөйт;
- "Санариптик инновациялык электрондук соода платформасы" долбоору — бизнес-процесстерди жана сооданы интеграциялоо үчүн заманбап электрондук жана сервистик экосистеманы түзүүгө багытталган;
- "Интеллектуалдык шаардык коомдук транспорт системасы" долбоору — транспорттук инфраструктуранын натыйжалуулугун жана коопсуздугун жогорулатуу максатында санариптик чечимдерди киргизүүнү карайт;
- "Акылдуу медициналык шаарлар" долбоору — санариптик технологияларды, телемедицинаны жана интеллектуалдык башкаруу системаларын колдонуу менен заманбап медициналык-сервистик кластерлерди түзүүгө багытталган.
