Кытайдын мурдагы юстиция министри коррупция боюнча айыпталып өмүр бою эркинен ажыратылды
Кытайдын мурдагы юстиция министри Тан Ицзюнь ири коррупциялык айып менен күнөөлөнүп, өмүр бою эркинен ажыратылганын 2-февралда мамлекеттик CCTV телеканалы кабарлады.
Маалыматка ылайык, сот Тан Ицзюнь 2006-жылдан 2022-жылга чейин мыйзамсыз түрдө 137 млн юандан ашуун (болжол менен 19,7 млн доллар) мүлк жана акча каражаттарын коррупциялык жол менен алганын аныктаган.
Соттун чечими менен Тан Ицзюнь өмүр бою саясий укуктарынан ажыратылып, анын бардык жеке мүлкү конфискацияланган.
64 жаштагы Ицзюнь эмгек жолун Кытайдын чыгышындагы Чжэцзян провинциясында баштаган. Ал бул аймакта 30 жылдан ашуун иштеп, Компартиянын облустук комитетинин төрага орун басарына чейин көтөрүлгөн. Кийинчерээк Ляонин провинциясынын губернатору болуп иштеп, 2020-жылы юстиция министри болуп дайындалган.
Тан Ицзюнга 2024-жылдын апрелинде "тартипти жана мыйзамды олуттуу бузган" деген шек менен тергөө иши ачылган. Бул термин Кытайда адатта коррупциялык кылмыштарга карата колдонулат. Ошол эле жылы ал Кытай Компартиясынын катарынан чыгарылган.
Өткөн дем алыш күндөрү Кытайдын коррупцияга каршы көзөмөл органы Өзгөчө кырдаалдар министри Ван Сянсинин тергөө иши башталганын да кабарлады.
