“Эмираттардын инвестициялык агенттиги” Кыргызстанга ири инвестиция салууга кызыкдар
Министрлер Кабинетинин Төрагасы Адылбек Касымалиев Дүйнөлүк өкмөттөр саммитинин алкагында “Эмираттардын инвестициялык агенттиги” (Emirates Investment Authority) суверендүү инвестициялык фондунун аткаруучу директору Мохаммед Хамад Аль-Мехайр менен жолукту. Бул тууралуу Өкмөттүн басма сөз кызматынан билдиришти.
Жолугушууда эки тараптуу кызматташуунун келечеги жана инвестициялык өнөктөштүктү өнүктүрүү маселелери талкууланды. Адылбек Касымалиев Кыргызстан суверендүү фонддор менен түз байланыш түзүүгө кызыкдар экенин белгилеп, өлкөдө ишке ашырылып жаткан ири долбоорлор тууралуу маалымат берүүгө даяр экенин айтты.
Анын айтымында, Кыргызстан Кытай, Борбор Азия жана Жакынкы Чыгышты байланыштырган стратегиялык аймакта жайгашып, транспорттук-логистикалык инфраструктура, энергетика, минералдык ресурстар, телекоммуникация, санариптик инфраструктура жана агробизнес тармактарында жогорку инвестициялык потенциалга ээ.
МинКаб Төрагасы акыркы төрт жылда Кыргызстандын экономикасы туруктуу өсүп, 2025-жылы ички дүң продукциянын өсүшү 11%га жеткенин белгиледи. Ошондой эле суверендүү кредиттик рейтингдердин жогорулашы жана бюджеттик кирешелердин көбөйүшү инвесторлор үчүн жагымдуу шарт түзүп жатканын кошумчалады.
“Биз инвестицияларды биргелешип ишке ашырууга, долбоорлорго капитал тартууга жана узак мөөнөттүү өнөктөштүк түзүүгө ачыкпыз”, — деди Адылбек Касымалиев.
Мындан тышкары, ал Эмираттардын инвестициялык агенттигинин өкүлдөрүн үстүбүздөгү жылдын апрель айында Бишкек шаарында өтө турган “Борбор Азия – Булуңдагы араб өлкөлөрүнүн кызматташтык кеңеши” форматындагы инвестициялык форумга катышууга чакырды.
Өз кезегинде Мохаммед Хамад Аль-Мехайр кызматташтыкты тереңдетүүгө кызыкдар экенин билдирип, конкреттүү инвестициялык долбоорлор боюнча мындан аркы диалогго даяр экенин айтты.
