Караколдо мыйзамды одоно бузган 16 ломбард мөөрлөндү
Каракол шаарында Улуттук коопсуздук мамлекеттик комитетинин кызматкерлери ломбарддарга карата кеңири масштабдуу текшерүү УКМКнын төрагасы Камчыбек Ташиевдин тапшырмасынын негизинде өткөрүлгөнүн ведомствонун басма сөз борбору билдирди.
Тергөө-ыкчам иш-чаралардын жүрүшүндө айрым уюмдар "Ломбарддардын ишмердүүлүгү жөнүндө" мыйзамдын талаптарын одоно бузганы аныкталган. Тактап айтканда, айрым каржы мекемелери күрөө катары жеке мүнөздөгү документтерди жана менчик укугун тастыктаган актыларды кабыл алышкан. Алардын катарында:
- жалпы жарандык паспорттор;
- туулгандыгы тууралуу күбөлүктөр;
- жер тилкесине жана мүлккө жеке менчик укугун тастыктаган мамлекеттик актылар бар.
Текшерүүнүн жыйынтыгында күч түзүмдөрү 16 ломбардды мөөрлөдү. Калган соода түйүндөрү боюнча текшерүү иштери улантылууда.
Карыз алуучулардын укуктарын коргоо максатында УКМКнын кызматкерлери бизнес ээлери менен түшүндүрүү иштерин жүргүзүштү. Негизги талап — "Сүткордук ишмердүүлүгүн чектөө жөнүндө" мыйзамды так сактоо. Белгиленген пайыздык чен жылына 30%дан ашпоого тийиш.
