Кыргызстандын 16 жараны Түштүк Кореяга иштөөгө кетти
2026-жылдын 3-февралында Кыргызстандын 16 жаранынан турган кезектеги топ EPS программасынын алкагында эмгек ишмердүүлүгүн жүргүзүү үчүн Корея Республикасына учуп кеткенин Эмгек, социалдык камсыздоо жана миграция министрлигинин басма сөз кызматы маалымдады.
Маалыматка ылайык, министрликтин алдындагы Чет өлкөлөргө жарандарды ишке орноштуруу борбору келишим түзүлгөн талапкерлер үчүн 5 күндүк окуу өткөрдү. Окуу программасында корей тилине жана аны иш чөйрөсүндө практикалык колдонууга өзгөчө көңүл бурулду.
Окуу программасы төмөнкүлөрдү камтыйт:
- маданияттар аралык түшүнүк жана адаптация — Корея Республикасынын маданияты жана тарыхы менен таанышуу;
- социалдык нормалар — жүрүм-турум эрежелери, салттар жана эмгек этикасы;
- корей тилин тереңдетип үйрөнүү — ийгиликтүү интеграция үчүн тил деңгээлин жогорулатуу;
- практикалык даярдык — жумуш чөйрөсүнө көнүү жана жетекчилик менен өз ара аракеттенүү.
Борбор Корея Республикасына жарандарды ишке орноштуруу иштерин 18 жылдан бери ийгиликтүү жүргүзүп келет. Корея Республикасынын Эмгек министрлиги менен түзүлгөн меморандумдун алкагында 5 миңден ашуун Кыргыз Республикасынын жараны жумуш менен камсыз болгон.
Учурда EPS программасы аркылуу Корея Республикасында 1,5 миңден ашуун кыргызстандык жаран эмгектенет. Алардын басымдуу бөлүгү кайра иштетүү өнөр жайында, анын ичинде тамак-аш, химия, кагаз тармактарында, ошондой эле пластик, резина жана айнек буюмдарын өндүргөн заводдордо иштешет.
Орточо айлык маянасы 1 700 долларды түзөт, мында жашоо жана тамак-аш чыгымдары (жарым-жартылай же толугу менен) иш берүүчү тарабынан төлөнөт.
EPS программасына катышуунун негизги талабы — корей тилин тийиштүү деңгээлде билүү.
