Бишкекте заманбап жаңы спорт комплекс ачылды
Бишкек шаарында Шералы Сыдыков атындагы Республикалык спорт колледжинин базасында курулган жаңы спорттук комплексинин ачылышы болгонун УКМКнын басма сөз кызматы билдирди.
УКМК төрагасы Камчыбек Ташиев катышты. Жаңы комплекс спорт, билим берүү жана жаштарды ар тараптуу өнүктүрүү мүмкүнчүлүктөрүн кеңейтүү максатында түзүлгөн. Анын курамына күрөш залы, көрүүчүлөр үчүн трибуналар, фудкорт, заманбап жатаканалар, конференц-зал жана окуу-машыгуу процесстерин, жыйындарды өткөрүүгө арналган кошумча жайлар кирет.
Күрөш залы заманбап килемдер жана грек-рим, эркин күрөш боюнча машыгууга ылайыкташкан жабдуулар менен камсыздалган. Ошондой эле комплексте машыгуу залдары, адистештирилген спорттук бөлмөлөр жана жалпы дене тарбия үчүн кардиозона каралган. Колледждин аймагында мечит да курулган.
Мындан тышкары, жаңы медициналык блок жана санитардык бөлүм биринчи медициналык жардам көрсөтүү жана профилактикалык кароолорду жүргүзүү үчүн заманбап жабдуулар менен жабдылган.
Ачылыш аземинде сөз сүйлөгөн Камчыбек Ташиев жаңы комплекс чемпиондорду гана эмес, ар тараптан өнүккөн жаштарды даярдоочу борбор болорун белгиледи. Анын айтымында, бул объект спортту, билим берүүнү жана саламаттыкты айкалыштырып, жогорку жетишкендиктерге жетүү үчүн бардык шарттарды түзөт.
