Бишкекте жогорку класс окуучуларына планшеттерди алуу каралып жатат
Бишкек шаарындагы жогорку класстын окуучулары үчүн мектептерге планшеттерди сатып алуу мүмкүнчүлүгү каралууда.
Бишкек шаардык кеңешинин экономика, бюджет, финансы жана инвестициялар боюнча туруктуу комиссиясынын жыйынында депутат Татьяна Кузнецова борбор калаадагы мектептердин компьютер менен камсыздалышы тууралуу суроо узатты.
"Окуу планында информатика сабагы 9-класска чейин окутулат. Сабак сааттары окуу программасына ылайык болушу керек. Компьютерлер жок шартта окуу программасы толук аткарылып жатабы?" — деп сурады ал.
Бишкек мэриясынын Билим берүү департаментинин директору Рахат Мусаева түшүндүргөндөй, Агартуу министрлиги 9–11-класстардын окуучуларын планшеттер менен камсыз кылуу боюнча суроо-талап жөнөткөн. Департамент тиешелүү эсептөөлөрдү жүргүзүп, маалыматты министрликке жолдогон. Анын айтымында, каражаттын көлөмү чоң.
Татьяна Кузнецова бул планшеттерге электрондук окуу китептери жүктөлөбү деп тактады. Рахат Мусаева бул суроого ооба деп жооп берди.
Ошондой эле департаменттин жетекчиси билдиргендей, 2026-жылкы бюджетте компьютерлерди сатып алууга 14 млн 140 миң сом каралган. Анын айтымында, бардык аймактар мугалимдер үчүн ноутбуктарды алышты, ал эми Бишкек жакынкы күндөрү алат.
