Коммерциялык банктар кардарлардын акчаларынын максатка ылайыктуулугун көзөмөлдөөгө милдеттүү – Салык кызматы
Коммерциялык банктар "кардарыңды тааны" (KYC) принцибине ылайык кардарлардын эсептерин пайдаланууну, анын ичинде акча каражаттарынын түшүшүнүн жана которууларынын максатка ылайыктуулугун көзөмөлдөөгө милдеттүү экенин Мамлекеттик салык кызматынын банктар менен өз ара иштешүү бөлүмүнүн башкы инспектору Айана Айтиева билдирди.
Анын айтымында, эрежелердин бузулушу боюнча сандык көрсөткүчтөр коммерциялык банктардын жана Улуттук банктын компетенциясына кирет. Ошол эле учурда ар бир банк кардарлардын операцияларын көзөмөлдөөгө жана жеке эсептердин, ошондой эле электрондук капчыктардын ишкердик максатта колдонулган учурларын аныктоого милдеттүү.
Айтиева билдиргендей, 2025-жылы салык кызматынын кызматкерлери рейддик иш-чаралардын жүрүшүндө ишкердик субъекттерине түшүндүрүү иштерин жүргүзүшкөн. Ишкерлерге мыйзам талаптарына ылайык катталган ишкердик эсептерин гана жана накталай эмес төлөмдөрдүн тиешелүү инструменттерин колдонуу зарылдыгы эскертилген.
Мониторингдин жыйынтыгы боюнча салык кызматы аныкталган учурлардын тизмесин түзүп, тиешелүү чараларды көрүү үчүн Улуттук банкка жана коммерциялык банктарга маалыматтарды жөнөткөн.
"Кайсы так чаралар колдонулары — бул Улуттук банктын жана коммерциялык банктардын компетенциясына кирген маселе", — деп түшүндүрдү ал.
Анын айтымында, ишкердик ишмердүүлүккө тиешеси жок учурда жеке эсептерди, электрондук капчыктарды жана QR-төлөмдөрдү колдонгон ишкерлердин саны көп болгондугуна байланыштуу, Улуттук банк бир катар коммерциялык банктарга айып пул санкцияларын колдонгон.
