Каржы министрлиги Каракол шаарына 1,5 млрд сом бөлөт
Каржы министрлиги Каракол шаарынын мэриясына парктарды, музейди жана заводдорду реконструкциялоо үчүн каражат бөлөрүн Жогорку Кеңештин каржы, бюджет, ишкердик жана атаандаштыкты өнүктүрүү боюнча комитетинин жыйынында каржы министринин орун басары Нурбек Акжолов билдирди.
Каржы министрлиги депутаттардын макулдашуусуна Министрлер кабинетинин эки тескемесин киргизди.
Биринчи тескемеге ылайык, Каракол шаарынын мэриясына 679 млн 600 миң сом бөлүнөт. Бул каражаттар төмөнкү объектилерди реконструкциялоого багытталат:
- Александр Пушкин атындагы паркка — 450 млн сом;
- Өмүкен Сейлакунов атындагы скверге — 70 млн сом;
- Каракол тарыхый-өлкө таануу музейине — 159 млн 600 миң сом.
Министрлер кабинетинин экинчи тескемесине ылайык, Каракол шаарынын мэриясына дагы 902 млн 700 миң сом бөлүү каралган. Бул каражаттар төмөнкү максаттарга жумшалат:
- Темир-бетон заводун модернизациялоого — 273 млн сом;
- Автобустарды сатып алууга — 300 млн сом;
- Муниципалдык ишканалар үчүн атайын техникаларды сатып алууга — 329 млн 700 миң сом.
