Салык кызматы салык декларациясын тапшыруу мөөнөтү жана айып пулдар тууралуу эскертти

Тийиштүү реестрге киргизилген мамлекеттик жана муниципалдык кызматкерлер Бирдиктүү салык декларациясын өз убагында тапшырууга милдеттүү экенин радионун түз эфиринде Мамлекеттик салык кызматынын декларациялоо жана салыктык эмес төлөмдөр башкармалыгынын башчысы Чынара Мамырбаева билдирди.

Анын айтымында, милдеттүү түрдө декларация тапшырууга тийиш болгон кызмат адамдарынын тизмеси президенттин 2017-жылдын 31-январындагы №17 жарлыгы менен бекитилген. Декларация 1-апрелге чейин тапшырылышы керек.

Ал белгилегендей, 1-июлга чейин салык органдары тапшырылган декларацияларга талдоо жүргүзөт, андан кийин материалдар укук коргоо органдарына өткөрүлүп берилет.

"Эгер декларация өз убагында берилбесе, прокуратура органдары тарабынан текшерүү учурунда 3 миң сом өлчөмүндө айып пул салынышы мүмкүн", — деди Мамырбаева.

Анын сөзүнө караганда, маалыматтардын дал келбестиги үчүн, анын ичинде жакын туугандар тууралуу туура эмес маалымат берилсе, 7 миң сом айып пул каралган. Кайрадан мыйзам бузуу кайталанса, административдик жоопкерчилик күчөтүлөт — Укук бузуулар жөнүндө кодекстин 348-беренесине ылайык айып пулдун өлчөмү 10 миң сомго чейин жетиши мүмкүн.

Ал декларация тапшыргандар өздөрүнүн киреше-чыгашалары, мүлкү тууралуу маалыматтарды, ошондой эле эгер жакын туугандары мамлекеттик кызматчы болсо, алар боюнча да маалыматтарды көрсөтүүгө милдеттүү экенин белгиледи.

"Милдеттүү декларациялоо реестрине киргизилген бардык адамдар үчүн талаптар бирдей", — деп кошумчалады Мамлекеттик салык кызматынын өкүлү.