Өткөн жылы 11,5 миңдей кыргызстандыкка протездик-ортопедиялык кызмат көрсөтүлгөн
2025-жылы 11,5 миңден ашуун кыргызстандык протездик-ортопедиялык кызмат көрсөтүүлөрдү алышканын Эмгек, социалдык камсыздоо жана миграция министрлигинин басма сөз кызматы билдирди.
Маалыматка ылайык, жардам алуучулардын саны 2024-жылга салыштырмалуу 7%га өскөн.
Тармактык республикалык мекеменин ишине 123 млн сом бөлүнгөн. Бул өткөн жылга караганда 10%га көп. Каржылоонун көбөйүшү жаңы технологияларды киргизүүгө жана кыймыл каражаттарына жана жекече буюмдарга муктаж жарандардын санын кеңири камтууга мүмкүндүк берди.
Мекемеде өндүрүштү кеңири модернизациялоо иштери уланууда. Бул максатка 97,8 млн сом бөлүнгөн. Эл аралык стандарттарга жооп берген заманбап жабдууларды жеткирүү жана кызматкерлерди окутуу боюнча келишимдер түзүлгөн.
"Киби" жана "Инди" аттуу кол протездеринин инновациялык түрлөрү өздөштүрүлдү. Бул жыйрылып, кайра жазылуучу жана бионикалык системаларды 34 бала алган. Анын жалпы баасынын 76%ын мамлекет төлөп берген.
Бишкек шаарындагы Түштүк Кореянын "Фаблаб" лабораториясы тарабынан эки чоң жаранга электрондук кол протездери даярдалып, тапшырылды.
Ошондой эле адистер бейтаптардын жеке муктаждыктарын эске алуу менен ортопедиялык бут кийимдердин жана бут-кол протездеринин моделдерин өркүндөтүүнү улантышууда.
