Туризмди өнүктүрүү фонду 56,1 млн сом дебитордук карызын кайтарды
МинКаб төрагасынын орун басары Бакыт Төрөбаевдин катышуусунда Экономика жана коммерция министрлигинин коллегия жыйыны өттү. Ведомствонун маалыматына ылайык, жыйында Туризмди өнүктүрүү фондунун 2025-жылдагы ишмердүүлүгү боюнча отчету угулду.
Фонддун жетекчиси Адилет Жанузаков жаңы команда келгенден кийин мекеменин ишине комплекстүү баа берилгенин билдирди. Баалоо каржылык тартипти күчөтүүгө, чыгымдардын натыйжалуулугун жогорулатууга жана каражаттарды артыкчылыктуу багыттарга топтоого багытталган.
"Каржылык көзөмөлдү күчөтүүнүн натыйжасында фонд 56,1 млн сом дебитордук карызды кайтарууга жетишти. Анын ичинде Нарын шаарындагы жана Тосор айылындагы долбоорлор боюнча насыялар толугу менен жабылды. IT, байланыш жана кошумча кызматтар боюнча операциялык чыгымдар оптималдаштырылып, ресурстарды башкаруунун туруктуу жана ачык-айкын модели түзүлдү", — деп айтылат маалыматта.
"Бүгүнкү күндө Rest Point түйүнүнүн 18 объектисинин 11и иштеп жатат, калгандары жогорку даярдык стадиясында. Мындан тышкары, Ош облусунда үч жаңы объектти куруу үчүн Дүйнөлүк банктын 4,5 млн доллардан ашуун гранттык каражаты тартылды", — деди Адилет Жанузаков.
Анын айтымында, фонддун туунду компаниясы — GoBus туруктуу жүргүнчү ташууларды камсыздап, ири туристтик жана имидждик иш-чараларда логистикалык өнөктөш катары кызмат көрсөтүүдө. Азыркы учурда шаарлар аралык каттамдар үчүн электрондук билет системасын киргизүүгө даярдык жүрүп жатат.
Ошол эле учурда фонд инвестиция тартууга жана узак мөөнөттүү экономикалык натыйжа түзүүгө багытталган улуттук маанидеги долбоорлорду илгерилетүүдө. "Тамга-Тосор" эл аралык спорт комплексинин долбоору боюнча инвесторлор менен активдүү иштер жүргүзүлүп, тартылган инвестициянын жалпы көлөмү 100 млн доллардан ашкан. Ошондой эле Baytik Mountain Resort жана Chatkal Mountain Resort долбоорлорун өнүктүрүү уланып жатат.
