Жалал-Абад облусунда Россиянын колдоосу менен 379 инвестициялык долбоор ишке ашып жатат

Жалал-Абад облусунда Россиянын колдоосу менен 379 инвестициялык долбоор ишке ашып жатканы бүгүн президенттин Жалал-Абад облусундагы өкүлү Тилек Текебаев менен Россиянын башкы консулу Роман Свистин жолугушуусунда айтылды.

Өкүлчүлүктөн билдиришкендей, жолугушууда облус башчысы Россия менен кызматташтык артыкчылыктуу багыт экенин белгилеп, Жалал-Абад облусу менен Россиянын бир катар аймактарынын ортосунда туруктуу байланыштар түзүлгөнүн маалымдады.

Өкүл 2025-жылдын жыйынтыгы боюнча Жалал-Абад облусунун Россия менен товар жүгүртүүсү 27 млн доллардан ашканына токтолду. Ошондой эле Россия-Кыргыз өнүктүрүү фондунун колдоосу менен облус аймагында 379 инвестициялык долбоор ишке ашырылып, жалпы 34 млн доллардан ашуун каражат багытталганын белгиледи.

Алардын катарында Токтогул районундагы Кайнама чакан ГЭСи, Кара-Көл шаарындагы балыкты кайра иштетүүчү завод, Манас шаарындагы Жеңиш эс алуу багынын курулушу, Ала-Бука районундагы мөмө-жемишти кайра иштетүүчү завод жана билим берүү тармагындагы мектеп курулуштары бар.