Фермер 1 гектар жерден 10 тонна алма алган
Суу ресурстары, айыл чарба жана кайра иштетүү өнөр жайы министрлиги тарабынан уюштурулуп жаткан "Агродиалог–2026" форумунда фермер Бектур Жунушалиев 2,5 гектар жердеги мөмө багынан быйыл гектарынан 10 тонна түшүм алганын ортого салды.
Ал заманбап агротехнологияларды колдонуу менен жемиштин сапатын жана түшүмдүүлүгүн жогорулаткан. Бул тажрыйба дыйкандардын өндүрүштүк натыйжалуулугун арттырууга жана айыл чарбасын өнүктүрүүгө үлгү болуп эсептелет.
"2,5 гектарга жакын багым бар. Анын жарымынан көбү алма. Калган жеринде алмурут, жүзүм, кокон гилас, өрүк, кара өрүк, шабдаалы, малина, кулпунай жана ар кандай гүлдөр бар. Алмабыздын көбү кызыл, аябай даамдуу – ред делишес сорту. Анан семеренко, голден сортторун да өстүрөм. Жергиликтүү алманы айланадыгы эл да жакшы баалап, сатып алат. Андыктан алма тигип жакшы бутка турса болот. Бакты аралап жүрүү ден соолукка да пайдалуу",-дейт ал.
