Өткөн жылы Кыргызстан боюнча эң көп каражат – 6,6 млрд сом Ош шаарына бөлүнгөн
2025-жылы Ош шаарына республикалык бюджеттен болуп көрбөгөндөй көлөмдө каражат бөлүнгөнүн шаар мэриясынын коллегиясынын жыйынында МинКаб төрагасы Адылбек Касымалиев билдирген.
"Биз шаарларга, мисалы, Токмок шаарына 1 млрд сом, Кара-Балта шаарына 1 млрд сом бөлдүк. Ал эми Кыргызстан боюнча эң көп каражат Ош шаарына — 6,6 млрд сом бөлүндү", — деди Касымалиев.
Анын айтымында, 2025-жылы Ош шаарында 9 мектеп жана 9 бала бакча жаңыланып, 7 спорттук объект, 2 маданий объект жана башка курулуштар пайдаланууга берилген. Президенттин тапшырмасы менен Турукташтыруу фондунан 2 млрд 200 млн сом бөлүнүп, анын ичинен 2 млрд сомго 8 негизги көчө оңдолду. Ал эми 200 млн сомго тротуарлар курулуп, жашылдандыруу иштери жүргүзүлгөн.
Ошону менен бирге, МинКаб төрагасы 2025-жылы түз инвестицияларды тартуу боюнча Ош шаары эң төмөнкү көрсөткүчкө ээ болгонун белгиледи.
2025-жылдын январь–сентябрь айларында шаарга тартылган чет өлкөлүк инвестициялардын көлөмү 1,2 млн долларды түзүп, бул 2024-жылга салыштырмалуу 44,1%га аз болгон.
Анын айтымында, бул жагдай шаардагы инвестициялык климаттын алсыздыгын жана инвестиция тартууда көйгөйлөр бар экенин көрсөтөт.
"Бизнес өкүлдөрү менен иш алып барууда өзгөчө кылдаттык керек. Ашыкча текшерүүлөргө, негизсиз дооматтарга, кирешеге кол салууга, моралдык басым көрсөтүүгө, коркутууга, мүлктү мыйзамсыз басып алууга жана ишкерлик субъекттерине карата ушундай аракеттерге жол берилбеши керек", — деди Касымалиев.
