Д.Бекешев: Кара куурайдан кийим өндүрүүнү тездетишибиз керек
Депутат Дастан Бекешев Жогорку Кеңештин жыйынында өнөр жайлык негизде кара куурайдан (техникалык каннабистен) кийим-кече өндүрүүнү тездетүүгө чакырды.
Анын айтымында, техникалык каннабисти ар түрдүү тармактарда колдонууга болот.
"Мисалы, кийим, сумка тигүүгө пайдаланса болот. Азыр тигүүчүлөр кездемени башка өлкөлөрдөн сатып алып жатышат. Өзүбүздүн чийки затты колдонсок болмок. Айыл чарба министрлиги бул багыттагы ишти ылдамдатышы керек", — деди ал.
Өз кезегинде министрдин биринчи орун басары Жаныбек Керималиев өнөр жайлык колдонууга киргизүү үчүн мыйзамдарга өзгөртүүлөрдү киргизүү зарыл экенин белгиледи.
"Азырынча бул баскычка жете элекпиз, бирок бул келечектүү багыт экенине кошулам. Эгерде Илимдер академиясы тиешелүү корутунду берсе, изилдөөлөрдү жүргүзүүгө болот. Каннабистен аскерлер үчүн форма жана ич кийим тигүүгө мүмкүн. Андан алынган кездеме жеңил жана аба өткөрүмдүү болот", — деп кошумчалады ал.
