Былтыр Кыргызстан 700 млн долларлык еврооблигация жайгаштырды

Министрлер Кабинетинин Төрагасы Адылбек Касымалиев Президент Садыр Жапаровдун төрагалыгы алдында өткөн республикалык кеңешмеде 2025-жылдын жыйынтыгы боюнча баяндама жасады. Бул тууралуу Өкмөттүн басма сөз кызматынан билдиришти.

Анын айтымында, өлкөнүн экономикалык көрсөткүчтөрү мурдагы узак мөөнөттүү болжолдордон кыйла ашты. 2026-жылга чейин өнүктүрүүнүн улуттук программасында жылдык орточо өсүш 5% деңгээлинде каралган болсо, акыркы төрт жылда реалдуу өсүш орточо 10% түздү. 2025-жылдын жыйынтыгында ИДП 1 триллион 976,4 миллиард сомго жетип, реалдуу өсүү 11,1% болду.

Касымалиев 2030-жылга чейин өлкө тейлөө моделинен индустриалдык-агрардык экономикага өтүп, өндүрүштүн үлүшүн 28–30%га чейин көбөйтүү максаты коюлганын белгиледи.

2025-жылы консолидацияланган бюджет 1 триллион 101,4 миллиард сомго жетти. Салык кызматынын кирешеси 2020-жылга салыштырмалуу дээрлик төрт эсеге өсүп, 304,3 миллиард сомду түздү. Бажы кызматынан түшкөн кирешелер “Смарт Бажы” системасын киргизүүнүн натыйжасында алты эсеге көбөйүп, 157,4 миллиард сомго жетти.

Өлкө ошондой эле капитал тартуунун жаңы инструменттерин колдонду. Алгачкы жолу 700 млн АКШ доллары өлчөмүндө еврооблигациялар жайгаштырылды. Мындан тышкары, алтын менен камсыздалган 50 млн токен көлөмүндөгү "USD KG" улуттук стейблкоининин эмиссиясы ишке ашырылып, "KG ST" стейблкоини эл аралык биржада листингден өттү.

Мамлекеттик башкаруу системасын реформалоо алкагында “Өкмөттүк акселераторлор” программасы ишке киргизилип, 100 күндүн ичинде 12 артыкчылыктуу маселе чечилди. 30дан ашык мыйзам долбоору иштелип чыгып, алардын 16сы кабыл алынды. Мамлекеттик кызмат көрсөтүүлөрдүн мөөнөтү кыскартылды.

Бизнеске колдоо көрсөтүү багытында жеңилдетилген насыялар, жер преференциялары жана ири долбоорлор боюнча мамлекеттик кепилдиктер каралган.

Жыйынтыгында Адылбек Касымалиев туруктуу өнүгүү үчүн мамлекеттик органдардын координацияланган иши маанилүү экенин белгиледи.