Импортко көзөмөл күчөтүлөт: техникалык талаптар боюнча семинар өттү
Экономика жана коммерция министрлигинин Техникалык жөнгө салуу жана метрология башкармалыгы Мамлекеттик бажы кызматынын адистери үчүн техникалык жөнгө салуу жана продукциянын Кыргыз Республикасынын жана Евразия экономикалык бирлигинин техникалык регламенттерине шайкештигин баалоо боюнча семинар-консультация өткөрдү. Бул тууралуу ведомстводон билдиришти.
Иш-чарага Стандартташтыруу жана метрология борборунун, курулушта сертификаттоо боюнча республикалык борбордун, байланыш тармагын сертификаттоо органынын, ошондой эле сертификаттоо органдарынын ассоциациясынын өкүлдөрү катышты.
Семинарда техникалык жөнгө салуу мыйзамдарын колдонуудагы практикалык маселелер, тышкы экономикалык ишмердүүлүктө продукциянын техникалык регламенттердин милдеттүү талаптарына шайкештигин тастыктоо тартиби жана сыноо үчүн продукциянын үлгүлөрүн алып келүү жол-жоболору талкууланды.
Ошондой эле үчүнчү өлкөлөрдөн товарларды импорттоодо шайкештик сертификаттары менен декларацияларынын аныктыгын текшерүү жана ыйгарым укуктуу органдардын өз ара аракеттенүүсү каралды.
Тараптар бажылык жол-жоболоштуруудагы актуалдуу маселелерди талкуулап, ички рынокко кирген продукциялардын коопсуздугун камсыз кылуу боюнча кызматташууну күчөтүүгө макулдашышты.
