Кыргызстан менен Гонконг салык боюнча макулдашууга кол коюшту
Кечээ Экономика жана коммерция министрлигинде онлайн-форматта Кыргыз Республикасы менен Кытай Эл Республикасынын Гонконг атайын административдик районунун ортосунда кирешеге жана капиталга салыктар боюнча кош салык салууну болтурбоо жана салыктан качуунун алдын алуу жөнүндө макулдашууга кол коюлду. Бул тууралуу Экономика министрлигинен билдиришти.
Макулдашуунун негизги максаты — эки өлкөдө иш жүргүзгөн чарба субъекттеринин кирешелерине кош салык салууну жоюу. Бул документ Кыргызстан менен Гонконгдун ортосундагы экономикалык кызматташууну кеңейтүүгө жана бизнес үчүн туруктуу шарттарды түзүүгө багытталган.
Кош салык салуудан качуу боюнча макулдашуулар түз чет элдик инвестицияларды тартуунун маанилүү инструменттеринин бири болуп саналат.
Документ ошондой эле резиденттерди дискриминациялык салык салуудан коргоону, салыктан качуунун жана макулдашуунун жоболорун кыянат пайдалануунун алдын алууну, ошондой эле эки өлкөнүн компетенттүү органдарынын ортосунда маалымат алмашууну карайт.
