Кытай бензин экспортун убактылуу токтотууну буйруду
Кытай бийлиги жергиликтүү мунай иштетүүчү заводдордон автомобилдик бензин жана дизелдик күйүүчү майды экспорттоону убактылуу токтотууну талап кылганын Bloomberg агенттиги жагдайдан кабардар булактарга таянып билдирди.
Маалыматка караганда, Пекиндин мындай чечими Жакынкы Чыгыштан чийки мунай жеткирүүдөгү үзгүлтүктөргө байланыштуу кабыл алынган. Бул көйгөйлөр Ирандагы согуштук кырдаалдан улам пайда болгон.
Кытай бийлиги бензин менен дизелдин экспортун убактылуу токтотуу ички рыноктогу абалды турукташтырууга жардам берет деп эсептейт.
Ошондой эле Кытайдагы ири мунай иштетүүчү компанияларга:
- жаңы экспорттук келишимдерди убактылуу түзбөй туруу,
- мурда макулдашылган айрым жеткирүүлөрдү жокко чыгаруу
сунушталды.
Бирок төмөнкү күйүүчү майларга өзгөчө уруксат берилген:
- авиациялык күйүүчү май,
- бункердик күйүүчү май (кемелер үчүн).
Мындан тышкары, жеткирүүлөрдү Гонконг жана Макаого улантууга уруксат берилген.
Эксперттердин айтымында, Кытай Ормуз кысыгынын жабылышынан эң көп жабыркашы мүмкүн болгон өлкөлөрдүн бири. Бул деңиз жолу аркылуу жакынкы убакка чейин дүйнөлүк мунай соодасынын үчтөн бир бөлүгү өткөн.
2024-жылы Кытайдын мунай импортунун болжол менен 14%ы Ирандан келген.
Адистердин баамында, 2026-жылдын жаз айынын башында Кытай топтогон мунай запастары 130 күндөн ашык убакытка жетиши мүмкүн.
Эгерде Иран менен АКШ жана Израиль ортосундагы жаңжал узакка созулуп, ири согушка айланып кетсе, Кытайдын күйүүчү май рыногундагы абал дагы татаалдашы мүмкүн.
Мурда Ислам революциясынын сакчылары корпусу 10 танкерге сокку урганын жана Ормуз кысыгын толук көзөмөлдөп жатканын билдирген.
Ормуз кысыгы жабылгандан кийин анын эки тарабында ондогон танкерлер топтолуп калган.
Эске салсак, бул кысык аркылуу дүйнөдөгү:
мунайдын болжол менен 20%ы,
суюлтулган жаратылыш газынын 30%ына чейин
өтөт. Бул энергия ресурстары Ирак, Сауд Арабиясы, Кувейт, Бахрейн, Катар жана Бириккен Араб Эмираттарысыяктуу Перс булуңундагы өлкөлөрдөн Азия базарына жөнөтүлөт.
Бул маанилүү деңиз коридорунун жабылышы энергия ресурстарынын баасынын кескин өсүшүнө алып келиши мүмкүн. Эксперттер мунайдын баасы баррелине 100 долларга чейин жетиши мүмкүн деп болжолдошууда.
