Россиянын SPOT системасы кыргызстандык ишкерлерге кандай таасир этет?
Экономика жана коммерция министрлигине караштуу "Кыргыз экспорт" борборунун директору Урмат Такиров "Кабар" улуттук маалымат агенттигиндеги пресс-конференцияда Россия тарабынан SPOT системасы киргизилип жатканы тууралуу айтып берди.
Такировдун айтымында, бул системаны киргизүү тууралуу чечим Россия өкмөтүнүн 2025-жылдагы токтому менен кабыл алынган. Максаты — ЕАЭБге мүчө өлкөлөрдүн аймагындагы товар агымын көзөмөлдөөнү күчөтүү. Анын айтымында, бул системаны Союздун башка катышуучулары буга чейин эле колдонуп келишет.
"Россия биздин негизги соода өнөктөшүбүз болгондуктан, бул жаңылык түздөн-түз биздин экспорттоочуларга таасир этет. SPOT системасынын негизги талабы — жүктү кабыл алуучунун болушу милдеттүү", — деди ал.
Мекеменин жетекчиси кошумчалагандай, система 1-апрелден пилоттук режимде иштей баштайт, ал эми 2026-жылдын 1-июлунан тартып толук ишке киргизилет.
Такиров белгилегендей, жүк жөнөтүүчүлөр жана экспорттоочулар үчүн эки негизги талап бар:
Биринчи — товар кабыл алынганын тастыктаган документтердин болушу.
Экинчи — камсыздоо төлөмүн жүргүзүү.
Бул үчүн атайын форма Россиянын салык кызматынын системасында жеткиликтүү болот. Россиядагы өнөктөш — Федералдык салык кызматы(ФСК) системасында катталган жүк алуучу — бул документти түзүп, камсыздоо суммасын киргизиши керек.
Такировдун айтымында, камсыздоо төлөмү электрондук эсеп-фактураларда көрсөтүлгөн КНС жана акциздердин негизинде эсептелет. Бул каражат Россиядагы өнөктөш тарабынан ФФСКтин атайын эсебине төлөнөт.
"Товарды кабыл алуу тууралуу документ түзүлүп, төлөм жүк жөнөтүлгөнгө чейин кеминде эки күн мурда жүргүзүлүшү керек. Эгерде товар Россияга төлөмдү жана жүк документин тастыктаган QR-кодсуз жөнөтүлсө, чек арадагы мобилдик топтор жүктү кайра артка кайтарып жибериши мүмкүн", — деди ал.
Жыйынтыгында Урмат Такиров кыргызстандык ишкерлерди Россиядагы өнөктөштөрү менен бул маселелерди алдын ала тактап, жаңы талаптарды так сактоого чакырды.
