Айылдарда ичүүчү суу тарифтери жогорулашы мүмкүн
Ичүүчү сууну жеткирүү кызматтарынын тарифтерин жөнгө салуу маселеси каралып жатканын Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Министрлик белгилегендей, ичүүчү суу системаларынын туруктуу иштешин камсыз кылууда тариф саясаты маанилүү роль ойнойт. Кыргызстанда жүргүзүлгөн изилдөөлөр көрсөткөндөй, учурда айыл жерлеринде колдонулуп жаткан тарифтер суу менен камсыздоо системаларын эксплуатациялоо чыгымдарын толук жаппай жатат.
Чыгымдардын толук жабылбагандыгынан айрым жерлерде системаларды өз убагында оңдоо жана техникалык тейлөөдө кыйынчылыктар жаралууда. Натыйжада жабдуулар бузулуп, суу берүү үзгүлтүккө учурашы мүмкүн, бул кошумча көйгөйлөрдү жаратат.
Ушуга байланыштуу ичүүчү суу менен камсыз кылуу кызматтарынын тарифтерин жөнгө салуу маселеси каралууда. Негизги максат — тарифтерди кызмат көрсөтүүнүн чыныгы өздүк наркы жана эксплуатациялык чыгымдарына ылайык келтирүү. Бул суу менен камсыздоо системаларынын туруктуу иштешин камсыздоого мүмкүндүк берет.
