Тоо-кен тармагынан 5 жылда бюджетке 217,9 млрд сом түшкөн
2021-2025-жылдар аралыгында тоо-кен тармагынан бюджетке 217,9 миллиард сомдон ашык салыктык жана салыктык эмес төлөмдөр түшкөн. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, тоо-кен тармагы өлкө экономикасында системаны түзүүчү негизги тармактардын бири бойдон калууда. 2025-жылдын 12 айында гана бул тармактан түшкөн каражат 65 миллиард сомго жетип, туруктуу өсүш байкалган.
Өлкө экономикасына өзгөчө салымды "Кумтөр" ишканасы кошуп келет. Акыркы беш жылда ишкананын кирешеси 76 миллиард сомду түзгөн.
Министрлик учурда пайдалуу кендердин запастарын көбөйтүү, өндүрүш көлөмүн арттыруу жана негизги кендердин иштөө мөөнөтүн узартуу боюнча иштер улантылып жатканын белгилейт.
Мындан тышкары, экологиялык саясаттын алкагында абанын сапатын жакшыртуу, биологиялык ар түрдүүлүктү сактоо жана экологиялык көзөмөлдү күчөтүү боюнча бир катар чаралар ишке ашырылууда.
